KONPARTSAKO PRENTSA OHARRA (2008/04/18a)

Iruñeko Udalak gaur, apirilaren 18an (ostirala), izan duen osoko bilkuran, Alde Zaharreko Erraldoi Konpartsari erraldoiak bertan gordetzeko udal-lokal iraunkorra uztea adostu da. ANVk, PSNk eta NABAIk aldeko botoa eman dute. Etxabe hori lortzen duten artean, Udalak autobus geltoki zaharra utziko du.

Alde Zaharreko Erraldoi Konpartsako kideok honakoa adierazi nahi dugu:

1.- ZORIONAK Alde Zaharrari, zorionak Lurra, Sua, Ura eta Airea erraldoiei eta Napoleón, Payaso, Demonio eta Pamplonica kilikiei.5 urte baino gehiago saiatzen egon ondoren, lasai eta eroso deskantsatzeko tokia lortu duzue. Esfortzua eta lana handiak izan dira, eta baita ilusioa ere, zeina nahiz eta oztopoak izan, ez baita sekula galdu.Auzokideengandik eta auzoko kolektiboengandik jasotako laguntza eskertu nahi dugu.Zorionak guztioi!
2.- 2007ko urtarrilaren 3tik egundaino, hainbatetan bildu gara UPNrekin, akordio batera heldu eta Lurra, Sua, Ura eta Airea erraldoiak gordetzeko lokal bat bilatzeko.Azken 14 hilabeteotan, 3 instantzia baino gehiago aurkeztu dizkiogu Udalari, erraldoiak gordetzeko lokala eskatuz.Horrez gain, hainbat bilera izan dugu José Iribasekin eta Paz Prietorekin. Azkenok, beti esan izan digute arazoa ahal bezain lasterren konpondu nahi zutela.Gaur UPNk kontrako botoa eman du eta, beraz, argi utzi du gurekin bildu denean gezurra esan digula.Aipatu jarrerak UPNk kultura- eta herri-jarduerok lagundu eta sustatzeko duen interes falta erakusten du.
3.- Azkenik, UPNri herriaren borondatea errespetatzeko eta betetzeko eskatzen diogu.Iruñeko Udalbatzak modu demokratikoan onartu duen mozioa ahal bezain lasterren bete dadin nahi dugu, Alde Zaharreko Erraldoiak, behingoaz, baldintza egokietan gorde ahal izan daitezen eta guztioi ongi pasarazten jarrai dezaten.Kalean ikusiko dugu elkar, hau ospatzeko modukoa da eta!

2008ko INAUTERIAK

Datorren otsailaren1, 2, 3 eta 4an Inauteriak datoz Iruñeko Alde Zaharrera. Erraldoien Konpartsak jai egun hauetan parte hartzera gonbidatzen zaituzte. Auzoa “Alde Zaharra Stadium” bihurtuko da. Beraz, aukera ezazu zure kirol-poli gustukoena. Zapi zaharrak, ileordeak, mozorroak, txapelak… alaitasuna eta parranda, merezi dugu eta! Gozatu! eta aurtengo pregoiak dioen moduan “Mari Trapuren jakituria handia ezagututa, zalantzarik ez dugu,... herriak irabaziko du, negu hotzaren aurrean, jendeak irabaziko du”. Mozorrotu eta Ongi ibili! dute.

Noticia publicada en Berria el 25/04/2007

Etxabe bat erraldoientzat

Bost urte igaro eta gero, Iruñeko Alde Zaharreko konpartsako gazteek ez dute lau buruhandiak gordetzeko toki finkorik aurkitu.

Milioi bat pezeta -6.000 euro- kosta zitzaien orduan, duela bost urte. Alde Zaharrean buruhandirik ez zela eta hori ezin zitekeela, eta dozena bat lagun elkartu ziren. Aurrekontua, zero. Baina buruhandiak egin behar zirela, Alde Zaharrean ez zeudela. Eta, duela ehun urte-edo Iruñeko Katedralak izan zituen kartoizko panpinak erreferentziatzat hartuta, lau egingo zituztela erabaki zuten. Izenak, berehala: Lurra, Sua, Ura eta Airea. Buruhandiak, Iruñeko Alde Zaharrekoak.
Oraindik ordaintzen ari dira. Hainbat jaitara eramaten dituzte, eta elkartasunezko kredituak lortu dituzte. Europako egitasmoren baten diru pixka bat... baina ordaintzen ari dira oraindik. Eta ez dute non gorde oraindik. Elkartasunezko etxabeetan izan dituzte orain arte. Burlatako Euskalherria Peñan, Mutiloako erraldoi konpartsen lokalean, Ortzadar dantza taldearen egoitzan. Udalari, artzapezpikutzari, Iruñeko Alde Zaharrean ugari diren komentuetako arduradunei toki bat eskatu diete behin baino gehiagotan. Baina bost urte igaro dira eta ez dute ezer lortu.
Joan den larunbatean, kartoizko buruak kutxetatik atera, eta zurezko egituren gainean jarri zituzten berriro. Ura, Lurra, Sua eta Airea, laurak dotore jantzita. Gaitariak deitu, eta karriketara atera zituzten laurak. Salatzera. «Udaletxean esaten digute etxabe bakar bat ere ez dagoela», azaldu du Iñaki Gilek, konpartsako kideak, «baina toki asko hutsik dauzkate».
HOGEITA BOST LAGUN KONPARTSAN. Kexu dira. Nafarroan, jaiak iristen direnean, askotan irakur daiteke notizia bera. Ez dagoela jenderik erraldoiak eta buruhandiak dantzatzeko, gazteak ez direla animatzen, ohitura galdu egingo dela. Buruhandiak etxabeetan geratzen direla. «Hemen ez», diote Alde Zaharreko konpartsakoek. «Gure auzoan jende gazteak bere burua antolatu du, hogeita bost lagun gaude buruhandiak kalera ateratzeko gogoz, eta konpartsa sortu dugu, gure poltsikoko dirua jarrita». Dirua jarri dute jantzien konponketetarako, eta Aldezar konpartsako txikitxoei lan hori guztia erakutsi diete, etorkizunezko egiazko erraldoi eskola sortzeko. Baina lo egiteko tokirik ez. Joan den larunbatean atera zituzten berriro. Kale Nagusia, Udaletxe plaza, Jarauta kalea, eta Gazteluko plazan azkenean, dantza dotorearekin amaitzeko. Jende askok galdera bera egin zien. «Baina nongoak dira erraldoi hauek?». «Non gordetzen dituzue?». Eta erantzunik ezin eman. Bost urte horrela. Oraindik ordaintzen ari dira. Sei mila euroak, elkartasunezko kredituen bidez. Hogeita bost bat gazte. Lau erraldoi eta Iruñeko Alde Zaharra.