La Comparsa de gigantes del Casco Viejo se adhiere al manifiesto, de la Comisión de fiestas, a favor de unos sanfermines txikis organizados desde y para el barrio.
Animamos a tod@s los vecin@s a adherirse!
SAN FERMIN TXIKI: AUZOKOA ETA AUZORAKO
1973tik modu herrikoi batean auzoak jarraiki antolatu ditu Sanfermin Txikiko jaiak, bere Jai Batzordearen bidez: ohiko zezentxoak, helduen krosa eta bestelako hamaika ekitaldi hunkigarri. 35 urtez irauten duen tradizio honetan, auzoak jaiak antolatu ditu auzorako.
Jai hauek parte-hartze eta auzolanaren adibidea ezin argiago dira. Jai Batzordea gune ireki bat da eta horretan hainbat talde, merkatari eta hamaika auzokidek parte hartzen du.
Hasieratik jaiak auzoak antolatu ditu, udaletxearen laguntza nola edo halakoa izanik ere. Beti aurrera atera izan dira, batzuetan administrazioak trabak jarri arren (isunak, baimenak ukatuak...). Are gehiago, jai hauek gero eta parte-hartzaileagoak, herrikoiagoak, parekideagoak eta jendetsuagoak. Jai alai eta naturalak dira... Alde Zaharreko errealitatearen eta sentimenduaren isla dira.
Gure ustez, bizilagunok gure auzoetako jaiak antolatzeko dugun paper horretan udalak laguntza eta erraztasunak eman beharko lituzke, kasu guztietan gure ekimenak errespetatuz. Tradizio herrikoia alde batera utziz, Alde Zaharreko jaiak antolatzeko Udalak beregain hartu duen erabakiaren aurrean, honetarako zure babesa eskatu nahi dizugu: auzoak Alde Zaharreko jaiak antolatzen jarraitu ahal izateko, bere Jai Batzordearen bidez.
Sanfermin txiki, auzokide guztion artean handi !!
ERRALDOI ETA KILIKIEN GUTTUNA (2008 iraila)
Kaixo txikiok! Zer moduz zaudete? Gu, primeran, eta zuek berriz ikusteko gogoz. Aurten ere, Alde Zaharreko erraldoiak (Lurra, Sua, Ura eta Airea) kilikiekin (Payaso, Demonio, Pamplonica eta Napoleon) bilduko gara, San Fermin Txiki Egunean zuekin guztiekin laster egitera eta dantzatzera ateratzeko. Iaz oso ongi izan ginen, zuek ere horrela egon izana espero dugu, eta aurten ere primeran pasa nahi dugu.
Dakizuen gisan, egun bakoitzean gure auzoko, Alde Zaharreko, burgu ezberdin batetik aterako gara. Ostiralean, San Zernin burguko kaleetan barna ikusi nahi zaituztegu, larunbatean Navarrerían eta, igandean, berriz, San Nikolasen.
A! Eta bizkor korrika egiten jakin dezazuen espero dugu: kilikiok asko entrenatu dugu joan den San Fermin Txiki Egunetik, zuetako inor ez dadin gure bergatik libratu… kar, kar, kar… Erraldoiok ere urte guztia daramagu entseatzen, nahiz eta Udalak ez digun oraindik udalbatzak agindu zigun lokalik utzi. Hala ere, horrek ez digu eragotziko San Fermin Txiki egunean, berriz ere, zuekin ateratzea.
Beno txikiok, egun gutxi barru ikusiko dugu elkar; ea San Fermin Txiki Egunean ibilbide guztian barna laguntzen gaituzuen, ados? Laster arte eta ongi ibili!
